بیرینجی بولوم
بیری وار ایمیش، بیری یوخ ایمیش، بیر کیشی وار ایمیش. بو کیشی‌نین بیر آروادی و بو آرواددان فاطما آدیندا چوخ عاغیللی و گؤزل قیزی وار ایمیش. بیر گون فاطمانین آناسی ناخوشلاییر و قیزینا دییر کی، من اؤلندن سونرا آتان تزه آرواد آلاجاق و او آرواد، سنی چوخ اینجیده‌جک. آما سن قارا اینه‌گیمیزدن موغایات اول، اونو اؤزون اوتار.
قیزین آناسی اؤلور و آتاسی گئدیب اؤزگه بیر آرواد آلیر. بو آروادین دا ایلک ائولی‌لیگیندن بیر چیرکین قیزی وار ایدی.
آرواد گؤیچک فاطمانی چوخ دؤگوب، اینجیدیرمیش. فاطما دؤزوب، هر گون قارا اینه‌گی اوتارماغا آپارارمیش.
فاطمانین آنالیغی اونا یون، داراق وئررمیش کی، چؤلده داراییب، اَییرسین (ایپ دوزلتسین).
فاطما یونو وئررمیش اینه‌گین آغزینا! قارا اینَـک یونو اودارمیش، سونرا حاضیر ایپی آغزیندان چیخاریب وئررمیش فاطمایا.
بیر گون فاطما یون دارادیغی یئرده کولَک اونون اَلچیمینین بیرینی گؤتوروب، قالدیردی هاوایا. فاطما بونون دالینجا قاچیب، دئدی:
- قانادینا قوربان، یئل بابا، اَلچیمیمی سال، بابا!
یئل اونون اَلچیمینی بیر باجادان سالدی. فاطما ائوه گیریب گؤردو کی، بورادا بیر هئیبتلی قاری اوتوروب، آلت دوداغی یئر سوپورور، اوست دوداغی گؤی سوپورور! قاری قاباغینا بیر قورباغا قویوب، اونو سیغاللاییر (نوازش ائیله‌ییر). بو، دئو آناسی ایدی.
فاطما قارییا باش اَگیب، دئدی:
- منیم الچیمیمی وئر.
قاری دئدی:
- گل باشیما باخ، سونرا وئریم.
فاطما اونون باشینا باخاندا گؤردو کی، ایلان- قورباغا ایله دولودور.
قاری سوروشدو:
- منیم باشیم یاخشی‌دیر، یا آنانین باشی؟
فاطما دئدی:
- سنینکی یاخشی‌دیر.
قاری سوروشدو:
- بو قورباغا گؤیچکدیر، یوخسا انسان؟
فاطما دئدی:
- گؤنول سئون گؤیچکدیر.
فاطمانین سؤزلری قارییا خوش گلدی. قاری اونون الچیمینی وئریب، دئدی:
- گئدرسن، قاباغینا بیر آغ سو، بیر قارا سو و سونرا بیر قیرمیزی سو چیخاجاق. آغ سودا چیمرسن، قارا سو ایله ساچینی یویارسان، قاشینا، کیپریگینه چکرسن، قیرمیزی سودان یاناقلارینا سورتَـرسن.
بیر ده قاری، توکوندن وئردی و دئدی کی، سنه لازیم اولسام، یاندیرارسان، یانیندا حاضیر اولارام.
فاطما توکو گؤتوروب، گئتدی. نئجه کی، قاری دئمیشدی، ائله ده ائیله‌دی. قاباقجا آغ سودا چیمدی، سونرا قارا سودا ساچلارینی یودو و قیرمیزی سودان گؤتوروب دوداغینا، یاناقلارینا چکدی. ائله گؤیچک اولدو، تایی- بنزَری دونیادا اولمادی.
آنالیغی فاطمانین گئج گلدیگینی گؤروب قیزینا دئدی:
- چیخ، گؤر فاطما نئجه اولدو؟
قیز چیخیب گؤردو کی، فاطما گلیر، آما ائله گؤزللشیب کی، آدام باخاندا گؤزو قاماشیر.
