آچین قاپیلاری گلن باهاردی
یئنه داش دیبینده گؤیردی دیشه
شاختا قورتاردی، قیش دا قورتاردی
حزین نفسیله دئییر بنؤوشه
آچین قاپیلاری گلن باهاردی
هر بوداق باشیندا بیر دسته گول‌وار
گول‌لرین اوستونده نه گلها- گل وار
قدیم بابا‌لاردان بئله مثال وار
«سویوغون شاختانین مئیدانی داردی»
آچین قاپیلاری گلن باهاردی
یاستی«یاشیل» چمنلرده اوتلاییر قوزو
بولاق‌لار باغرینا باسیب یارپیزی
دوشون، داغ دؤشونده اریین بوزی
هر بیر قارانلیغین دان یئری واردی
آچین قاپیلاری گلن باهاردی
کسمه اومیدینی کسمه باهاردان
اومیددی قورتاران انسانی داردان
دئمه بیرده چیچک بیته‌جک هاردان
اسنسه کولک‌دی، یاغانسا قاردی
آچین قاپیلاری گلن باهاردی
«عندلیب» بوگلن نه خوش قوناقدی
طبیعت یولونا چیچک‌لر یاغدی
هایقیران دره‌دی، کیشنه‌ین داغدی
دئمه نه های هارای نه شارها شاردی
آچین قاپیلاری گلن باهاردی
سخاوت عزتی